احرص على الي لا قطعته يجيك
وجنب عن الي في شدتك خلاك
ورحب بقلبك لمن هو يحييك
رحب به بقلبك قبل تمد يمناك
ترى من يحبك غصب عنه يبكيك
ولا كل من يحبك قال لك أنا أفداك
ترى من يحبك لو بشينك يزكيك
لأنك غلا عيونه ولا عين تسواك
إن أحتجت يقطع من القلب ويعطيك
ولا البخيل لو هي الدعوة ما أعطاك
ولا كل من ضحك لك وده يسليك
ولا حبيبك لو شان لك الوضع سلاك
والي يبيك لو تصد عنه ما يخليك
تلقاه طول عمره واقف لك إيتحراك
ولا كل من جاك في مصيبتك يعزيك
ولا كل من تغليت عنه ياالغالي ناداك
ترى الحسود والحقود بالحقد يعميك
لوتعيش فرحتك والله ماجاك وهنّاك
ولا الكفو والسنافي عن نفسه يبديك
ما همه فلان وعلان وهذا ولاذاك
قلتها وتمت بحمدالله وفضله وتكفيك
وصلو على محمد وعلمي وقد جاك
شعر
*نجم بن سهيل الذيابي*