يقولون راع الجزل يبقى مع الأيام
وانا اقول راع الجزل في عالي القمّة
توارد عليّ افكار حارت بها الأقلام
مثل عد ما احدٍ بالليالي وصل جمّة
عليها من اسلوبي مثل بصمة الإبهام
تميّز لصارت كل الافكار ملتمّة
والا يا وجودي وجد محكوم بالإعدام
من اسباب خايب وابتلى العام في دمّه
وجاه الخبر بأبوه والقلب صار حطام
ومن بعدها بأسبوع قالوا وفاة امّه
ولا احدٍ فزع له كن ما دينه الإسلام
ومنّه تبرّى اخوانه وخاله وعمّه
ما غير الدموع بعينه ونبرته آلام
وطول الليالي غير راسه على كمّه
والا ياوجودي وجد رجلٍ سهر ما نام
إذا اصبح على مطمّة واذا امسى على مطمّة
فقير وكريم وباللوازم يقوم شمام
ولا احدٍ من ربوعه يلد النظر يمّه
طواه الهيام وصار يمشي جنوب وشام
مثل تايهٍ والدرب يخطيه ويخمّه
ولا له وسيلة توصله حلّة الأكرام
ماغير يتصبّر يكتب الشعر ويصمّه
وحالي يشابه حالهم والقلوب هيام
وإذا العشق له سمٍّ فأنا شاربٍ سمّه
ثمانية شهور ومهلك الفكر والأقدام
من غيابها شوف القنيدي كثر غمّه
لها حسن رباني وهيبة ملوك عظام
ولها شخص متفاني ما يسمع بها النمّة
جنوبية العينين شرقية السلهام
شمالية الأنساب في ذمتي ذمّة
عسى الله يجمعني بها تالي الأيام
ويهون المصاب وحلمي البارح يتمّه
شعر : سلطان القنيدي
...........................
ماجستير بلاغة ونقد..
عضو جماعة وادي القرى للشعر.
_ اللوحة:بريشة الفنانة روان بدر التميمي/عضو مؤسس الجمعية السعودية للفنون التشكيلية(جسفت)بالعلا.
التعليقات 4
4 pings
إنتقل إلى نموذج التعليقات ↓
غير معروف
2020-08-28 في 3:12 ص[3] رابط التعليق
ماشاء الله إبداع 😍😍
اسير الشوق
2020-08-28 في 10:31 م[3] رابط التعليق
ماشاءالله تبارك وصف شاعر مبدع اتمنى لك مزيد من التوفيق والسداد شاعرنا سلطان القنيدي
غير معروف
2020-08-28 في 11:15 م[3] رابط التعليق
صح لسانك يا ابو محمد
غير معروف
2020-08-29 في 1:26 ص[3] رابط التعليق
الرسمه خيالللللل ومع الشعر فوققق الخيالل اتمنى دعم الرسامه اكثر فاكثر 😫😫