الله يبيض وجه راع الجمايل
راع الوفا والطيب راع الجميله
وماهي غريبة من عيال الحمايل
رجال تركي للحمول الثقيله
واصحابنا في الوقت مثل المخايل
وتلقى المطر ماهو بحسب المخيله
فيها ليا ارعد كل مضمار سايل
ومافيه وادي غير مليان سيله
وفيها صواقع مع بروق وشمايل
وامطارها مثل الندى في الثميله
وقت الرخا تعدادهم بالهوايل
وكل يقول انا سند كل ميله
لكنهم وقت الشدايد قلايل
اثنين والثالث برد فيه حيله
هذا الصحيح وللتجارب دلايل
يقولها من طال بالهم ليله
وفي الساعة الحرجة تبين الاصايل
والكل مسرج للنواميس خيله
وانته قسم بالله والشك زايل
انك رجل تسوي بطيبك قبيله
في اليوم الاغبر جيت والوقت مايل
وعجزت كيف الراي كيف الوسيله
وقفت شامخ كنك جبال حايل
اجا وسلمى للسواري دليله
دبيت صدرك ياعريب السلايل
احمد لعل سنين عمره طويله
يفدونه اللي يشبهون العوايل
اللي صغار الهم عنده مهيله
وقفتك وقفه وانت راع الجمايل
لك وقفة تشفا الكبود العليله
اقولها من غير نقص وطايل
احمد ولد عايد ويسوى قبيله
الشاعر /عبدالرحمن بن عليثة المحياوي الجهني
التعليقات 1
1 pings
ناصر المحياوي
2020-12-30 في 1:17 ص[3] رابط التعليق
صح الله لسانك الشاعر عبدالرحمن عليثه المحياوي
وبيض الله وجه الأخ أحمد عايد الصيدلاني
ولايستغرب الوفاء من اهله فهو شهم ابن شهم اخو شهم