واعيني اللي كل ما مريت مع درب الرحيل
هلت مثل غر المزون اللي تهل ثعولها
حتى ليال الذكريات اللي لها وقتٍ طويل
شاهدتها بالعين قدامي تعيد فصولها
شفت السواقي تشحذ الماء والحزن ماله مثيل
والزمل تبرك للحمول ولاتشيل حمولها
وشفت الزمن وقف تقول انه رجل دمه ثقيل
والعين كل اللي تشوفه يستفز فضولها
اللي من اول كان ممكن صار شبه المستحيل
واحلامنا رجعت وخيبتها تجر ذيولها
يكذب عليك اللي يقول فلان مزبان الدخيل
وإلا يقول فلان لاعقدت يجيب حلولها
هذا حكي فاضي وكل اللي يقال علوم ليل
علوم لاحول الصواب ولا الصواب بحولها
وأنا صبرت ولكن صبري لم يكن صبراً جميل
لقيت بيبان الهقاوي محكمات قفولها
وكابرت بشموخ العزيز وقلت دمعي مايسيل
لو ضاقت الدنيا علي بعرضها وبطولها
انا ولد راع الجناب الدمث والشبح الطويل
أقولها والراس طايل والصحيح يقولها
ماني بخيل الأ بدمع العين وانا اشهد بخيل
ناصر عليثه دمعته ماهو بسيط نزولها
راسي مثل قمة طويق وشامخ شموخ النخيل
والنار والجنة بيد رب العباد دخولها
شعر : ناصر بن عليثه المحياوي الجهني
التعليقات 1
1 pings
سعود الجهني
2020-04-21 في 3:32 م[3] رابط التعليق
ماني بخيل الا بدمع العين وانا اشهد بخيل
ناصر عليثه دمعته ماهو بسيط نزولها
ونعم انا اشهد انك كفو وكريم ووافي وجه وجاه
وشاعر من أبرز شعراء جهينه والخليج
صح لسانك على القصيده الجزله ياشاعرنا الجزل
الله يحفظك ويطول عمرك